ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
ք.Ստեփանակերտ
ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅՈՒՆՈՒՄ ԱՆՇԱՐԺ ԳՈՒՅՔԻ ԿԱԴԱՍՏՐԱՅԻՆ ԾԱԾԿԱԳՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Լեռնային Ղարաբաղի Հանրապետության կառավարությունը որոշում է.
1. Հաստատել Լեռնային Ղարաբաղի Հանրապետությունում անշարժ գույքի կադաստրային ծածկագրման կարգը (կցվում է):
2. Լեռնային Ղարաբաղի Հանրապետության անշարժ գույքի պետական միասնական կադաստրի վարչությանը` եռամսյա ժամկետում հաստատել կադաստրային տարածքների, ենթատարածքների, սեկտորների, թաղամասերի ու անշարժ գույքի միավորների ծածկագրերը` ըստ շրջանների և համայնքների:
3. Սույն որոշումն ուժի մեջ է մտնում 1999 թվականի հունիսի 1-ից:
| |
Հաստատված է
ԼՂՀ կառավարության
1999թ. մայիսի 18-ի
թիվ 96 որոշմամբ |
Կ Ա Ր Գ
Լեռնային Ղարաբաղի Հանրապետության անշարժ գույքի կադաստրային ծածկագրման
1. Անշարժ գույքի կադաստրային ծածկագիրը թվերի համակցություն է, որը համապատասխանում է Լեռնային Ղարաբաղի Հանրապետության վարչատարածքային բաժանմանը ու անշարժ գույքի միավորին և պահպանվում է այնքան ժամանակ, քանի դեռ միավորը գոյություն ունի որպես ֆիզիկական և իրավական մեկ ամբողջություն:
2. Անշարժ գույքի հաշվառման, գնահատման և պետական գրանցման նպատակով Լեռնային Ղարաբաղի Հանրապետության տարածքը բաժանվում է կադաստրային տարածքների, ենթատարածքների, սեկտորների, թաղամասերի ու անշարժ գույքի միավորների:
3. Կադաստրային ծածկագիրն ունի հաստատուն և աստիճանական կառուցվածք` բաղկացած թվերի հետևյալ խմբերից.
3.1. Առաջին խումբը կազմված է երկնիշ թվից ու սկսվում է 01-ից, որը կադաստրային տարածքի ծածկագիրն է և համապատասխանում է շրջանի տարածքին:
3.2. Երկրորդ խումբը կազմված է եռանիշ թվից ու սկսում է`
ա/ 001-ից, որը կադաստրային ենթատարածքի ծածկագիրն է և համապատասխանում է համայնքի տարածքին.
բ/ 801-ից, որը կադաստրային սեկտորի ծածկագիրն է և համապատասխանում է շրջանի վարչական սահմանում առկա, բայց համայնքների վարչական սահմաններից դուրս գտնվող տարածքին:
3.3. Երրորդ խումբը կազմված է երկնիշ թվից ու սկսում է 01-ից, որը կադաստրային թաղամասի ծածկագիրն է և համապատասխանում է բնակավայրի թաղամասի տարածքին:
3.4. Չորրորդ խումբը կազմված է վեցանիշ թվից ու սկսում է 000001-ից, որը անշարժ գույքի միավոր հողակտորի ծածկագիրն է և համապատասխանում է հողամասի տարածքին:
3.5. Հինգերորդ խումբը կազմված է եռանիշ թվից ու սկսում է 001-ից, որը հողամասի վրա կառուցված միավոր շենքի կամ շինության ծածկագիրն է:
3.6. Վեցերորդ խումբը կազմված է եռանիշ թվից ու սկսում է 001-ից, որը միավոր շենքի կամ շինության բնակելի կամ ոչ բնակելի տարածքի համարն է: