Գրանցված է Լեռնային Ղարաբաղի Հանրապետության արդարադատության նախարարության կողմից «22» փետրվարի 2005թ. Պետական գրանցման թիվ 333 նախարար                    Ռ. Հայրապետյան

 

Լեռնային Ղարաբաղի Հանրապետության արդարադատության նախարար

 

Հ Ր Ա Մ Ա Ն

 

«18» փետրվարի 2005թ.

թիվ 16

 ք.Ստեփանակերտ

 

ՀԱՐԿԱԴԻՐ ԿԱՏԱՐՈՂՆԵՐԻ ԱՏԵՍՏԱՎՈՐՄԱՆ ԱՆՑԿԱՑՄԱՆ

ԿԱՐԳՆ ՈՒ ՊԱՅՄԱՆՆԵՐԸ ՍԱՀՄԱՆԵԼՈՒ ՄԱՍԻՆ

(վերնագիրը փոփ. 16.12.2014 N 135-Ն, խմբ. 23.09.2022 N139-Ն)

 

Համաձայն «Հարկադիր կատարումն ապահովող ծառայության մասին» օրենքի 13-րդ հոդվածի 7-րդ մասի

(նախաբանը փոփ. 23.09.2022 N139-Ն)

 

Հ Ր Ա Մ Ա Յ ՈՒ Մ  Ե Մ`

 

1. (կետն ուժը կորցրել է 16.12.2014 N 135-Ն)

2. Սահմանել հարկադիր կատարողների ատեստավորման անցկացման կարգն ու պայմանները` համաձայն հավելված 2-ի:

(2-րդ կետը փոփ. 23.09.2022 N139-Ն)

 

 

Ռ. ՀԱՅՐԱՊԵՏՅԱՆ

 

Հավելված թիվ 1 ԼՂՀ արդարադատության նախարարի 2005 թվականի փետրվարի 18-ի թիվ 16 հրամանի

 

ԿԱԶՄ

ՀԱՐԿԱԴԻՐ ԿԱՏԱՐՈՂՆԵՐԻ ԱՏԵՍՏԱՎՈՐՄԱՆ ՀԱՆՁՆԱԺՈՂՈՎԻ

(Հավելված 1-ը ուժը կորցրել է 16.12.2014 N 135-Ն) 

 

Հավելված 2 Լեռնային Ղարաբաղի Հանրապետության արդարադատության նախարարի «18» փետրվարի 2005թ. թիվ 16 հրամանի

 

ԿԱՐԳ ԵՎ ՊԱՅՄԱՆՆԵՐ

ՀԱՐԿԱԴԻՐ ԿԱՏԱՐՈՂԻ ԱՏԵՍՏԱՎՈՐՄԱՆ ԱՆՑԿԱՑՄԱՆ

(վերնագիրը փոփ. 23.09.2022 N139-Ն)

 

1. Ընդհանուր դրույթներ

 

1. Սույն կարգը կարգավորում է հարկադիր կատարողի ատեստավորման հետ կապված հարաբերությունները:

2. Ատեստավորումը զբաղեցրած պաշտոնին հարկադիր կատարողի մասնագիտական գիտելիքների և աշխատանքային ունակությունների համապատասխանության որոշումն է:

3. Յուրաքանչյուր տարի հարկադիր կատարողների առնվազն մեկ երրորդը ենթակա է պարտադիր ատեստավորման: Հերթական ատեստավորումն անցկացվում է երեք տարին մեկ անգամ:

4. (կետն ուժը կորցրել է 23.09.2022 N139-Ն)

5. (կետն ուժը կորցրել է 23.09.2022 N139-Ն)

6. Ատեստավորման ենթակա չեն`

ա/ հարկադիր կատարման ծառայության բարձրագույն խմբի պաշտոններ զբաղեցնողները,

բ/ տվյալ պաշտոնը մեկ տարուց պակաս ժամկետով զբաղեցնող հարկադիր կատարողները, եթե նրանք նման ցանկություն չունեն հայտնել,

գ/ հղիության և ծննդաբերության կամ մինչև երեք տարեկան երեխայի խնամքի կապակցությամբ արձակուրդում գտնվող հարկադիր կատարողները, եթե նրանք նման ցանկություն չեն հայտնել,

դ/ «Հարկադիր կատարումն ապահովող ծառայության մասին» օրենքի 38-րդ հոդվածի 1-ին մասի 3-րդ կետով նախատեսված հիմքով տվյալ տարում ծառայությունից ազատվողները:

(6-րդ կետը փոփ. 23.09.2022 N139-Ն)

7. Ատեստավորման ենթակա, սակայն արձակուրդում, գործուղման մեջ գտնվող կամ ժամանակավոր անաշխատունակ հարկադիր կատարողները ենթակա են ատեստավորման ծառայության անցնելուց հետո՝ երկամսյա ժամկետում, բացառությամբ հղիության և ծննդաբերության կամ երեխայի խնամքի կապակցությամբ արձակուրդում գտնվող հարկադիր կատարողների:

(7-րդ կետը խմբ. 23.09.2022 N139-Ն)

8. Հղիության և ծննդաբերության կամ երեխայի խնամքի կապակցությամբ արձակուրդում գտնվող հարկադիր կատարողները ենթակա են ատեստավորման արձակուրդից վերադառնալուց հետո ոչ շուտ, քան մեկ տարի հետո, եթե վերջիններս ցանկություն չեն հայտնել ավելի վաղ ատեստավորվելու համար:

(8-րդ կետը լրաց. 23.09.2022 N139-Ն)

 

2. Ատեստավորման նախապատրաստական աշխատանքների կազմակերպումը

 

9. Հարկադիր կատարումն ապահովող ծառայության պետի տեղակալը ատեստավորման հանձնաժողովին (այսուհետ նաև՝ հանձնաժողով) է ներկայացնում յուրաքանչյուր տարի պարտադիր ատեստավորման ենթակա գլխավոր և առաջատար խմբերի պաշտոններ զբաղեցնող հարկադիր կատարողների ցուցակը:

(9-րդ կետը փոփ., լրաց. 23.09.2022 N139-Ն)

10. Ատեստավորման ենթակա հարկադիր կատարողները ոչ ուշ, քան ատեստավորումից մեկ ամիս առաջ տեղեկացվում են ատեստավորման անցկացման մասին:

11. Ատեստավորումից առնվազն երկու շաբաթ առաջ ատեստավորման հանձնաժողովին է ներկայացվում հարկադիր կատարողի ծառայողական բնութագիրը:

(11-րդ կետը լրաց. 23.09.2022 N139-Ն)

12. Հարկադիր կատարողը ատեստավորման անցկացման օրվանից առնվազն մեկ շաբաթ առաջ պետք է ծանոթանա իր ծառայողական բնութագրին:

Բնութագրին համաձայն չլինելու դեպքում հարկադիր կատարողը կարող է ներկայացնել գրավոր առաջարկություններ, որոնք ծառայողական բնութագրի հետ միասին փոխանցվում են ատեստավորման հանձնաժողովին:

13. Ծառայողական բնութագիրը պետք է պարունակի տվյալներ հարկադիր կատարողի մասին, նրա գործնական հատկանիշների և ծառայողական գործունեության արդյունքների հիմնավորված գնահատականը: Այդ գնահատականը պետք է հիմնվի նախորդ ատեստավորումից հետո ընկած ժամանակաշրջանում հարկադիր կատարողի կողմից կատարած աշխատանքների վերլուծության վրա:

14. Հարկադիր կատարողի ղեկավարը պարտավոր է

ա/ վերլուծել ատեստավորման ենթակա հարկադիր կատարողների աշխատանքային ցուցանիշները` նրանց զբաղեցրած կոնկրետ պաշտոնում,

բ/ ատեստավորման ենթակա հարկադիր կատարողների հետ անցկացնել զրույց նրանց գործնական, անձնական հատկանիշների, մասնագիտական պատրաստվածության և աշխատաոճի վերաբերյալ, տալ անհրաժեշտ հանձնարարականներ թերությունների վերացման և աշխատանքների բարելավման նպատակով:

15. Ատեստավորման ենթակա հարկադիր կատարողների ծառայողական բնութագրերը մինչև ատեստավորման անցկացումը մեկ շաբաթ առաջ հանձնվում են ատեստավորման հանձնաժողովին:

(15-րդ կետը փոփ. 23.09.2022 N139-Ն)

 

3. Ատեստավորման հանձնաժողովի խնդիրները և լիազորությունները

 

16. Հանձնաժողովի խնդիրներն են`

ա/ հարկադիր կատարումն ապահովող ծառայության համար արհեստավարժ կադրերի ընտրության և ծառայողական առաջխաղացման արդյունավետ իրագործումը,

բ/ անցկացվող ատեստավորման թափանցիկության և հրապարակայնության ապահովումը,

գ/ ատեստավորման միջոցով հարկադիր կատարողի` իր զբաղեցրած պաշտոնին համապատասխանության, ինչպես նաև ծառայողական առաջխաղացման նպատակահարմարության գնահատումը:

(16-րդ կետը փոփ. 23.09.2022 N139-Ն)

17. Ատեստավորման հանձնաժողովը`

ա/ իրականացնում է քննարկումներ առանձին հարցերի շուրջ և ընդունում որոշումներ.

բ/ ամփոփում է ատեստավորման արդյունքները,

գ/ քվեարկության արդյունքում ընդունում է որոշում,

դ/ քննարկում է ատեստավորման արդյունքների հետ կապված ատեստավորման մասնակիցների բողոքները, անհրաժեշտության դեպքում տալիս է նոր եզրակացություն,

ե/ իրականացնում է օրենքով, սույն կարգով և այլ իրավական ակտերով իրեն վերապահված լիազորություններ:

 

4. Հանձնաժողովի աշխատանքների կազմակերպումը

 

18. Հանձնաժողովն իր աշխատանքները իրականացնում է նիստերի միջոցով:

19. Հանձնաժողովը որոշումներն ընդունում է քվեարկության միջոցով:

20. Հանձնաժողովի ընդունած որոշումներն իրավազոր են, եթե դրանց ընդունմանը մասնակցել է հանձնաժողովի անդամների 2/3:

21. Հանձնաժողովի որոշումներն ընդունվում են քվեարկությանը մասնակցած հանձնաժողովի անդամների մեծամասնությամբ:

22. Հանձնաժողովի որոշումները ձևակերպվում են գրավոր և ստորագրվում են հանձնաժողովի նախագահի և քարտուղարի կողմից:

 

5. Հանձնաժողովի նախագահը

 

23. Հանձնաժողովի նախագահը`

ա/ կազմակերպում և ղեկավարում է հանձնաժողովի աշխատանքները,

բ/ վարում է հանձնաժողովի աշխատանքները,

գ/ հարցազրույցի ժամանակ կարող է դադարեցնել անհարկի ծավալված բանավեճը,

դ/ որոշում է ատեստավորման հետ կապված հարցերի, դիմումների ու բողոքների քննարկման հերթականությունը` այն համաձայնեցնելով հանձնաժողովի անդամների հետ,

ե/ Արցախի Հանրապետության արդարադատության նախարարի համաձայնությամբ իր գործառույթների իրականացումը ժամանակավորապես վերալիազորում է հանձնաժողովի այլ անդամի:

(23-րդ կետը փոփ. 23.09.2022 N139-Ն)

 

6. Հանձնաժողովի անդամը

 

24. Հանձնաժողովի անդամը`

ա/ հանձնաժողովի նախագահի հանձնարարությամբ վարում է` հանձնաժողովի նիստը,

բ/ մասնակցում է հարցազրույցի անցկացմանը և իրավունք ունի հարցեր տալու մասնակիցներին,

գ/ հարցազրույցից հետո մասնակցում է հանձնաժողովի կողմից յուրաքանչյուր ատեստավորվողի համար անցկացվող փակ գաղտնի քվեարկությանը` քվեարկելով կողմ կամ դեմ,

դ/ մասնակցում է քվեաթերթիկների ձայները հաշվելուն,

ե/ ստորագրում է ատեստավորման եզրակացությունը, իսկ հատուկ կարծիք ունենալու դեպքում ստորագրության կողքին գրում է «Հատուկ կարծիքը կցվում է» բառերը և առանձին թղթի վրա շարադրած ու ստորագրած կարծիքը կցում է,

զ/ ծանոթանում է նիստերի արձանագրություններին,

է/ իրականացնում է սույն կարգով և այլ իրավական ակտերով իրեն վերապահված լիազորություններ:

 

7. Հարցազրույցի անցկացումը

 

25. Հարկադիր կատարողի ատեստավորումը անցկացվում է հարցազրույցի միջոցով:

26. Հարցազրույցը անցկացվում է հարկադիր կատարողի` իր զբաղեցրած պաշտոնի համար նախատեսված գործառութային պարտականությունների իմացությունը ստուգելու նպատակով:

Հարցազրույցի ընթացքն արձանագրվում է:

27. Հանձնաժողովը յուրաքանչյուր հարկադիր կատարողի հետ հարցազրույցը անցկացնում է առանձին: Հարցազրույցի ընթացքում հանձնաժողովի հարց տվող անդամը, լսելով հարկադիր կատարողի պատասխանը, բարձրաձայն հաստատում է պատասխանի ճիշտ կամ սխալ լինելու մասին, իսկ սխալ պատասխանի դեպքում ասում է ճիշտ պատասխանը:

28. Հարկադիր կատարողի հետ հարցազրույցն ավարտելուց անմիջապես հետո հարցազրույցի արդյունքների ամփոփման համար անցկացվում է փակ գաղտնի քվեարկություն:

29. Հարցազրույցից հետո հանձնաժողովը փակ գաղտնի քվեարկությամբ ընդունում է հետևյալ որոշումներից մեկը`

ա/ համապատասխանում է զբաղեցրած պաշտոնին,

բ/ կարող է զբաղեցնել ավելի բարձր պաշտոն,

գ/ կարող է ներկայացվել խրախուսման,

դ/ ատեստավորումը հետաձգել մինչև մեկ տարի ժամկետով և առաջարկել հարկադիր կատարողին գործուղելու վերապատրաստման,

ե/ չի համապատասխանում զբաղեցրած պաշտոնին:

30. Հանձնաժողովի նախագահը բացում է քվեատուփը, մեկ առ մեկ հանում է քվեաթերթիկները և բարձրաձայն հայտարարում հարկադիր կատարողի ազգանունը, անունը, հայրանունը և տված ձայների կողմ կամ դեմ լինելը: Մեկից ավելի նշում պարունակող կամ ոչ մի նշում չպարունակող քվեաթերթիկը համարվում է անվավեր:

Հանձնաժողովի նախագահի հայտարարություններն արձանագրվում են հանձնաժողովի քարտուղարի կողմից:

(30-րդ կետը փոփ. 23.09.2022 N139-Ն)

31. Քվեարկության արդյունքում ընդունված է համարվում այն որոշումը, որը ստացել է քվեարկությանը մասնակցած` հանձնաժողովի անդամների կեսից ավելիի կողմ ձայները: Եթե որոշումներից ոչ մեկի վերաբերյալ չի հավաքվել քվեարկությանը մասնակցած` հանձնաժողովի անդամների կեսից ավելիի կողմ ձայն, ապա քվեարկության են դրվում երկու առավել կողմ ձայներ հավաքած որոշումները: Այդ որոշումներից ընդունված է համարվում առավել կողմ ձայներ հավաքած որոշումը, իսկ հավասար ձայների դեպքում` հարկադիր կատարողի համար առավել նպաստավորը:

 

8. Ատեստավորման արդյունքների ամփոփումը

 

32. Ատեստավորման ավարտից հետո հանձնաժողովն ամփոփում է արդյունքները և յուրաքանչյուր հարկադիր կատարողի համար կազմում է ատեստավորման թերթ /ձևը կցվում է/:

33. Ատեստավորման թերթը պետք է ստորագրեն հանձնաժողովի նախագահը, քարտուղարը և անդամները:

34. Հարկադիր կատարողն իրավունք ունի ծանոթանալու ատեստավորման արդյունքներին և բողոքարկելու դրանք ատեստավորման արդյունքներին ծանոթանալուց հետո ոչ ուշ, քան 3 օրվա ընթացքում: Հանձնաժողովը քննարկում է բողոքը և ընդունում որոշում: Հարկադիր կատարողը բողոքարկման արդյունքների հետ համաձայն չլինելու դեպքում դրանք կարող է բողոքարկել վերադասության կամ դատական կարգով, բայց ոչ ուշ, քան ատեստավորման արդյունքների հայտարարման օրվանից հետո յոթ օրվա ընթացքում: Հարկադիր կատարողը ցանկության դեպքում, կարող է գրավոր դիմել հանձնաժողովին և ստանալ ատեստավորման թերթի պատճենը:

35. Ատեստավորման հանձնաժողովը ատեստավորման օրվանից մեկշաբաթյա ժամկետում ատեստավորման արդյունքները և կայացրած որոշումները ներկայացնում է Արցախի Հանրապետության արդարադատության նախարարին, որը ոչ ուշ, քան տասնօրյա ժամկետում ընդունում է որոշում:

(35-րդ կետը փոփ. 23.09.2022 N139-Ն)

36. Հարկադիր կատարողի ժամանակավոր անաշխատունակության կամ արձակուրդում գտնվելու ժամանակ ատեստավորման արդյունքների հիման վրա համապատասխան որոշումն ընդունվում է նրա` ծառայություն ներկայանալու օրվանից հետո եռօրյա ժամկետում:

37. Հանձնաժողովի որոշումները, արձանագրությունները և մնացած բոլոր փաստաթղթերը Արցախի Հանրապետության օրենսդրությանը համապատասխան պահպանվում և արխիվացվում են:

(37-րդ կետը փոփ. 23.09.2022 N139-Ն)

38. Ատեստավորման արդյունքները պահվում են հարկադիր կատարողի անձնական գործում:

39. Հարկադիր կատարողների առաջին ատեստավորումն անցկացվելու է 2005թ. նոյեմբերի 1-ից:

(հավելված 2-ը փոփ., խմբ., լրաց. 23.09.2022 N139-Ն)

 

Ձև

ԱՏԵՍՏԱՎՈՐՄԱՆ ԹԵՐԹ

/հարկադիր կատարողի/

___________________________________________________________________________________

Ատեստավորման ձև

''______''

''______''  հարցազրույց

1. Ազգանունը, անունը, հայրանունը _______________________________________________________

2. Ծննդյան օրը, ամիսը, տարեթիվը _______________________________________________________

3. Ատեստավորման պահին զբաղեցրած պաշտոնի անվանումը և այդ պաշտոնում նշանակվելու

տարեթիվ ___________________________________________________________________________

___________________________________________________________________________________

___________________________________________________________________________________

4. Նախորդ ատեստավորման եզրակացությունը_______________________________________________

___________________________________________________________________________________

5. Հարկադիր կատարողին հարցազրույցի փուլում տրված հարցերը և դրանց պատասխանները /համառոտ/

___________________________________________________________________________________

___________________________________________________________________________________

___________________________________________________________________________________

___________________________________________________________________________________

6. Քվեարկությանը մասնակցել են ատեստավորման հանձնաժողովի _______________________________

անդամները, որոնցից կողմ են քվեարկել _____________________ անդամ:

7. Հարցազրույցի արդյունքում ատեստավորման հանձնաժողովի ընդունած որոշումը.

___________________________________________________________________________________

___________________________________________________________________________________

 

Հանձնաժողովի

նախագահ _________________________________________________           ____________________

                             /պաշտոնը, ազգանունը, անունը, հայրանունը/                                  ստորագրությունը

 

Հանձնաժողովի

անդամներ _________________________________________________           ____________________

                           /պաշտոնը, ազգանունը, անունը, հայրանունը/                                    ստորագրությունը

 

_____________________ (_________________)

_____________________ (_________________)

_____________________ (_________________)

_____________________ (_________________)

_____________________ (_________________)

 

Հանձնաժողովի քարտուղար _______________________________    (_________________)

Ատեստավորման անցկացման ամսաթիվը __________ _______________________20__թ.

Ատեստավորման թերթի հետ ծանոթացա` _________________________________    (__________)

                                                                    /Ա .Ա.Հ. հարկադիր կատարողի կոչումը/

                                                                                    _____ _____________________20__թ.

 

(Ձևը փոփ. 23.09.2022 N139-Ն)