ք.Ստեփանակերտ

Համաձայն «Նոտարիատի մասին» օրենքի 14-րդ հոդվածի 3-րդ և «Արցախի Հանրապետության բյուջետային համակարգի մասին» օրենքի 15-րդ հոդվածի 9-րդ մասերի` Լեռնային Ղարաբաղի Հանրապետության կառավարությունը որոշում է.

(նախաբանը փոփ. 25.01.22 N 43-Ն)

1. Հաստատել՝

1) նոտարի կողմից մատուցվող վճարովի ծառայությունների իրականացման կարգը՝ համաձայն N1 հավելվածի.

2) նոտարի կողմից մատուցվող վճարովի ծառայությունների սակագները` համաձայն N 2 հավելվածի.

3) Արցախի Հանրապետության արդարադատության նախարարության արտաբյուջետային հաշվի միջոցների օգտագործման կարգը՝ համաձայն N3 հավելվածի:

(1-ին կետը փոփ. 25.01.22 N 43-Ն)

2. Լեռնային Ղարաբաղի Հանրապետության ֆինանսների նախարարին` Լեռնային Ղարաբաղի Հանրապետության արդարադատության նախարարությանն սպասարկող Լեռնային Ղարաբաղի Հանրապետության ֆինանսների նախարարության գանձապետարանի ստորաբաժանումում Լեռնային Ղարաբաղի Հանրապետության արդարադատության նախարարության համար բացել արտաբյուջետային հաշիվ` նոտարի կողմից վճարովի ծառայությունների մատուցումից ստացվող ֆինանսական մուտքերի հաշվեգրման նպատակով:

3. Սույն որոշումն ուժի մեջ է մտնում պաշտոնական հրապարակման պահից, իսկ դրա գործողությունը տարածվում է 2012 թվականի սեպտեմբերի 1-ից հետո ծագած հարաբերությունների վրա:

Կ Ա Ր Գ

1. Սույն կարգով սահմանվում է Արցախի Հանրապետության նոտարների (այսուհետ՝ նոտար) կողմից մատուցվող վճարովի ծառայությունների իրականացման գործընթացը:

(1-ին կետը փոփ. 25.01.22 N 43-Ն)

2. Նոտարական գործողության կատարման համար դիմած անձանց ցանկությամբ նոտարն իրավունք ունի մատուցել վճարովի ծառայություններ, մասնավորապես՝ կազմել գործարքների կամ իրավական այլ փաստաթղթերի նախագծեր, իրականացնել իրավական այլ ծառայություններ, որոնք նախատեսված են Լեռնային Ղարաբաղի Հանրապետության կառավարության 2012 թվականի սեպտեմբերի 18-ի N 662-Ն որոշմամբ:

3. Նոտարը չի կարող անձին պարտադրել` օգտվել վճարովի ծառայություններից, եթե վերջինս հայտարարում է, որ դրա կարիքը չունի և կարող է ինքնուրույն կազմել իրավական փաստաթղթի նախագիծը կամ օգտվել այլ անձի ծառայություններից:

4. Նոտարի կողմից ծառայությունը մատուցվում է ծառայության համար նախատեսված վճարը վճարելուց հետո՝ նոտարական գործողության կատարման համար դիմած անձի դիմումի հիման վրա, որի ձևը հաստատում է Արցախի Հանրապետության արդարադատության նախարարը:

(4-րդ կետը փոփ. 25.01.22 N 43-Ն)

4.1. 2020 թվականի սեպտեմբերի 27-ին Արցախի Հանրապետության դեմ սանձազերծված պատերազմական գործողությունների հետևանքով զոհված անձանց ընտանիքների անդամները (ծնող, ամուսին, երեխա) և մշտական բնակության վայրից տեղահանված անձինք մինչև 2022 թվականի դեկտեմբերի 31-ը ներառյալ ազատվում են նոտարի կողմից մատուցվող՝ սույն որոշմամբ սահմանված վճարովի ծառայությունների համար վճարումներ կատարելու պարտավորությունից:

(4.1-ին կետը լրաց. 17.12.20 N 676-Ն, փոփ. 25.01.22 N 43-Ն )

5. Նոտարի կողմից մատուցվող վճարովի ծառայությունների սակագները պետք է փակցված լինեն նոտարական գրասենյակում` նոտարական ծառայություններից օգտվողների համար տեսանելի տեղում: Նոտարի կողմից մատուցվող յուրաքանչյուր ծառայության համար վճարը ներառում է տվյալ նոտարական գործողության համար անհրաժեշտ քանակով՝ օրինակելի ձևերով փաստաթղթերի նախագծերի պատրաստումը և տրամադրումը:

6. Մատուցվող վճարովի ծառայության համար վճարումները կատարվում են անկանխիկ եղանակով՝ Արցախի Հանրապետության արդարադատության նախարարության արտաբյուջետային հաշվին փոխանցելու միջոցով:

(6-րդ կետը փոփ. 25.01.22 N 43-Ն)

7. Մատուցված վճարովի ծառայության գումարի չափը նշվում է վավերացման ենթակա փաստաթղթի վավերացման մակագրության մեջ:

8. Նոտարը պարտավոր է ծառայությունը մատուցել պատշաճ որակով՝ մեկ աշխատանքային օրվա ընթացքում, բացառությամբ այն դեպքերի, երբ ծառայությունն անհնար է եղել մատուցել անհաղթահարելի ուժի (ֆորս մաժոր) հետևանքով: Ծառայությունը մատուցված է համարվում համապատասխան նոտարական գործողությունը նոտարական գրանցամատյանում գրանցելու և դիմողի կողմից ստորագրելու պահից:

9. Եթե ծառայությունը մատուցելու համար նախատեսված ժամկետում դիմողը չի ներկայանում ծառայության արդյունքում տրամադրվող փաստաթուղթն ստանալու կամ համապատասխան նոտարական գործողությունը կատարելու համար, ապա ծառայության մատուցումը համարվում է պատշաճ կատարված:

10. Նոտարական գործողության կատարման համար դիմած անձի դիմումը և վճարովի ծառայության համար վճարումները հավաստող անդորրագիրը պահվում են նոտարի մոտ և կցվում են համապատասխան նոտարական գործի նյութերին:

11. Մատուցված վճարովի ծառայությունների վերաբերյալ նոտարը մինչև յուրաքանչյուր ամսվան հաջորդող ամսվա 5-ը Արցախի Հանրապետության արդարադատության նախարարի սահմանած ձևի հաշվետվություն է ներկայացնում Արցախի Հանրապետության արդարադատության նախարարություն:

(11-րդ կետը փոփ. 25.01.22 N 43-Ն)

(հավելված N 1-ը լրաց. 17.12.20 N 676-Ն, փոփ. 25.01.22 N 43-Ն)

Ս Ա Կ Ա Գ Ն Ե Ր

ՆՈՏԱՐԻ ԿՈՂՄԻՑ ՄԱՏՈՒՑՎՈՂ ՎՃԱՐՈՎԻ ԾԱՌԱՅՈՒԹՅՈՒՆՆԵՐԻ

* Ծառայությունը մատուցվում է Արցախի Հանրապետության արդարադատության նախարարի սահմանած կարգով որակավորման ստուգում անցած նոտարների կողմից:

(հավելված N  2-ը փոփ. 25.01.22 N 43-Ն)

Կ Ա Ր Գ

1. Սույն կարգով սահմանվում է նոտարի կողմից իրականացվող վճարովի ծառայություններից Արցախի Հանրապետության արդարադատության նախարարության (այսուհետ՝ Նախարարություն) արտաբյուջետային հաշվում գոյացած միջոցների օգտագործման կարգը:

(1-ին կետը փոփ. 25.01.22 N 43-Ն)

2. Նախարարության արտաբյուջետային հաշվի միջոցները տնօրինվում են Արցախի Հանրապետության արդարադատության նախարարի կողմից:

(2-րդ կետը փոփ. 25.01.22 N 43-Ն)

3. Նախարարության արտաբյուջետային հաշվում գոյացած միջոցների կեսը օգտագործվում է նոտարական գրասենյակների աշխատողների նյութական խրախուսման, իսկ մյուս կեսը` համակարգի զարգացման համար:

4. Նոտարական գրասենյակների աշխատողների նյութական խրախուսման համար նախատեսված միջոցները բաշխվում են նոտարական գրասենյակների միջև` կատարված նոտարական գործողությունների քանակին համամասնորեն, իսկ նոտարական գրասենյակի աշխատողների միջև՝ նրանց պաշտոնային դրույքաչափերին համամասնորեն, և վճարվում են յուրաքանչյուր եռամսյակ: Յուրաքանչյուր եռամսյակի համար այդ միջոցները հաշվարկվում և վճարվում են մինչև համապատասխան եռամսյակին հաջորդող ամսվա 15-ը՝ բացառությամբ սույն կարգի 5-րդ կետով նախատեսված դեպքի:

(4-րդ կետը փոփ., խմբ. 02.02.2016 N 31-Ն)

4.1. (կետն ուժը կորցրել է 02.02.2016 N 31-Ն)

5. Տարվա վերջին եռամսյակի համար դրամական պարգևատրումները բաշխվում են տվյալ բյուջետային տարվա վերջին 5 օրվա ընթացքում:

(5-րդ կետը փոփ. 02.02.2016 N 31-Ն)

6. Նյութական խրախուսման համար նախատեսված համապատասխան եռամսյակի միջոցները չեն տրամադրվում այն աշխատողներին, որոնց նկատմամբ նախկինում կիրառվել է կարգապահական տույժ, որը սահմանված կարգով հանված կամ մարված չէ: Նյութական խրախուսման համար նախատեսված համապատասխան եռամսյակի միջոցները կարող են չտրամադրվել նաև նոտարիատի գործունեությունը կանոնակարգող իրավական ակտերի պահանջները և աշխատանքային կարգապահությունը խախտած աշխատողներին նրանց վերադաս աշխատողների միջնորդության հիման վրա: Սույն կետով սահմանված հիմքերով չտրամադրված միջոցները ուղղվում են համակարգի զարգացմանը:

(6-րդ կետը խմբ. 02.02.2016 N 31-Ն)

7. Համակարգի զարգացման համար նախատեսված միջոցները տնօրինվում են Արցախի Հանրապետության արդարադատության նախարարի կողմից հաստատված և Արցախի Հանրապետության ֆինանսների նախարարի հետ համաձայնեցված նախահաշվին համապատասխան:

(7-րդ կետը փոփ. 25.01.22 N 43-Ն)

8. Համակարգի զարգացման համար նախատեսված միջոցներն օգտագործվում են համակարգի զարգացման, մասնավորապես՝ տեխնիկական վերազինման, վերանորոգման, պահպանման, գույքի և այլ սարքավորումների գնման, վարձակալության, աշխատանքների և ծառայությունների ձեռքբերման, որոշակի ժամկետով կնքված աշխատանքային պայմանագրերով աշխատողների վարձատրության և համակարգի զարգացմանն ուղղված այլ միջոցառումների ֆինանսավորման նպատակով:

9. Համակարգի զարգացմանն ուղղված ծախսերը` կապված ապրանքների, աշխատանքների ծառայությունների ձեռքբերման հետ, կատարվում են «Գնումների մասին» օրենքով սահմանված կարգով:

(9-րդ կետը փոփ. 25.01.22 N 43-Ն)

10. Տվյալ բյուջետային տարվա ընթացքում չօգտագործված միջոցները փոխանցվում են հաջորդ տարի` նույն նպատակով օգտագործելու համար:

11. Նախարարությունը ֆինանսատնտեսական գործունեության մասին եռամսյակային և տարեկան հաշվետվությունների հետ միասին Արցախի Հանրապետության ֆինանսների նախարարություն է ներկայացնում հաշվետվություն՝ Նախարարության արտաբյուջետային հաշվի միջոցների գոյացման և տնօրինման մասին:

(11-րդ կետը փոփ. 25.01.22 N 43-Ն)

(հավելված  N 3-ը լրաց. 05.12.2012 N 871-Ն, փոփ., խմբ. 02.02.2016 N 31-Ն, փոփ. 25.01.22 N 43-Ն)