ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Համաձայն «Լեռնային Ղարաբաղի Հանրապետության օրենսդիր, գործադիր և դատական իշխանության մարմինների ղեկավար աշխատողների և մասնագետների պաշտոնային դրույքաչափերի մասին» Լեռնային Ղարաբաղի Հանրապետության օրենքի 12-րդ հոդվածի, ԼՂՀ կառավարությունը որոշում է.

1. ԼՂՀ նախագահի աշխատակազմի, ԼՂՀ Ազգային Ժողովի աշխատակազմի և ԼՂՀ կառավարության աշխատակազմի ղեկավարների, ԼՂՀ նախագահին առընթեր անվտանգության խորհրդի քարտուղարի, ԼՂՀ պետական կենսաթոշակային հիմնադրամի նախագահի, ԼՂՀ անշարժ գույքի կադաստրի պետական կոմիտեի նախագահի, ԼՂՀ Հանրային հեռուստառադիոընկերության խորհրդի նախագահի պաշտոնային դրույքաչափերը սահմանել 90000 դրամ:

(1-ին կետը լրաց. 29.01.2002 N 26, լրաց. 08.07.2003 N 203)

2. ԼՂՀ նախագահի, ԼՂՀ Ազգային Ժողովի և ԼՂՀ կառավարության աշխատակազմերի աշխատողների պաշտոնային դրույքաչափերը սահմանել թթ. 1,2,3 և 4 հավելվածների համաձայն:

3. ԼՂՀ գլխավոր դատախազի տեղակալների, ԼՂՀ նախարարների տեղակալների, ԼՂՀ Ստեփանակերտի քաղաքապետի տեղակալի, ԼՂՀ Վիճակագրության պետական խորհրդի անդամների, ԼՂՀ Ազգային վիճակագրական ծառայության նախագահի տեղակալի, ԼՂՀ անշարժ գույքի կադաստրի պետական կոմիտեի նախագահի տեղակալի և ԼՂՀ պետական կենսաթոշակային հիմնադրամի նախագահի տեղակալի պաշտոնային դրույքաչափերը սահմանել 72000 դրամ

(3-րդ կետը խմբ. 26.11.2002 N 64)

4. ԼՂՀ Ասկերանի, Մարտակերտի, Մարտունու և Հադրութի շրջանների վարչակազմերի ղեկավարների պաշտոնային դրույքաչափերը սահմանել 72000 դրամ, Շուշիի և Շահումյանի շրջանների վարչակազմերի ղեկավարների պաշտոնային դրույքաչափերը սահմանել 65000 դրամ, իսկ Քարվաճառի տարածքում ԼՂՀ կառավարության լիազոր ներկայացուցչի պաշտոնային դրույքաչափը` 58000 դրամ: ԼՂՀ վարչությունների պետերի և պետական կառավարման հանրապետական այլ մարմինների ղեկավարների պաշտոնային դրույքաչափերը սահմանել 60000 դրամ:

(4-րդ կետը խմբ. 11.05.1999 N 87)

5. ԼՂՀ պետական վարչությունների պետերի տեղեկալների պաշտոնային դրույքաչափերը սահմանել 72000 դրամ: Ասկերանի, Հադրութի, Մարտակերտի և Մարտունու շրջանների վարչակազմերի ղեկավարների տեղակալների պաշտոնային դրույքաչափերը սահմանել 48000 դրամ, իսկ Շահումյանի և Շուշիի շրջանների վարչակազմերի ղեկավարների տեղակալների պաշտոնային դրույքաչափերը` 44000 դրամ:

(5-րդ կետը խմբ. 10.04.2001 N 89)

6. Ստեփանակերտ քաղաքի դատախազի, Ասկերանի, Մարտակերտի, Մարտունու, Հադրութի և Շուշիի շրջանների դատախազների պաշտոնային դրույքաչափերը սահմանել 54000 դրամ:

7. Ուժը կորցրած ճանաչել Լեռնային Ղարաբաղի Հանրապետության կառավարության 1998թ. օգոստոսի 11-ի «Լեռնային Ղարաբաղի Հանրապետության օրենսդիր, գործադիր և դատական իշխանության մարմինների ղեկավար աշխատողների և մասնագետների պաշտոնային դրույքաչափերը սահմանելու մասին» թիվ 143 որոշումը:

8. Սույն որոշումն ուժի մեջ է մտնում 1999 թվականի ապրիլի 1-ից, իսկ նրա թթ. 1,2,3 և 4 հավելվածներով սահմանված պաշտոնային դրույքաչափերը կիրարկվում են 1999 թվականի հունվարի 1-ից, բացառությամբ ԼՂՀ նախագահի խորհրդականի, մամուլի ծառայության ղեկավարի, նախագահի օգնականի, նախագահի աշխատակազմի ղեկավարի տեղակալի և բաժնի վարիչի, ԼՂՀ Ազգային Ժողովի բաժնի վարիչի, ԼՂՀ Ազգային Ժողովի ընդհանուր բաժնի վարիչի, ԼՂՀ Ազգային Ժողովի նախագահի խորհրդականի, օգնականի, ԼՂՀ Ազգային Ժողովի մամուլի քարտուղարի և ԼՂՀ կառավարության աշխատակազմի վարչության պետի, բաժնի վարիչի, աշխատակազմի ղեկավարի տեղակալի, ընդհանուր բաժնի վարիչի, ԼՂՀ վարչապետի օգնականի և մամուլի քարտուղարի պաշտոնային դրույքաչափերի:

Ամսական պաշտոնային դրույքաչափերի բարձրացումն իրականացվում է ԼՂՀ 1999 թվականի պետական բյուջեով համապատասխան մարմինների աշխատողների համար հաստատված աշխատավարձի ֆոնդի սահմաններում: