ԱՐՑԱԽԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք. Ստեփանակերտ

ՍՆՆԴԱՄԹԵՐՔԻ ՈՐՈՇ ՏԵՍԱԿՆԵՐԻ ՎԱՃԱՌՔԻ ԵՎ ՁԵՌՔԲԵՐՄԱՆ ՀԱՏՈՒԿ

ԿԱՐԳ ՍԱՀՄԱՆԵԼՈՒ ԵՎ ՀԱՆՁՆԱԺՈՂՈՎ ՍՏԵՂԾԵԼՈՒ ՄԱՍԻՆ

Հիմք ընդունելով «Ռազմական դրության իրավական ռեժիմի մասին» օրենքի 11-րդ հոդվածի 1-ին մասի 3-րդ կետը, ղեկավարվելով Արցախի Հանրապետության Նախագահի 2022 թվականի դեկտեմբերի 13-ի ՆՀ-1792-Ն հրամանագրի (այսուհետ՝ Հրամանագիր) 9-րդ կետով և Արցախի Հանրապետության Նախագահի 2017 թվականի սեպտեմբերի 25-ի ՆՀ-108-Ն հրամանագրով սահմանված կարգի 6-րդ, 92-րդ կետերով ու 105-րդ կետի 1-ին ենթակետով` Արցախի Հանրապետության կառավարությունը որոշում է.

1. Սահմանել սննդամթերքի որոշ տեսակների վաճառքի և ձեռքբերման հատուկ կարգ (այսուհետ՝ Կարգ)՝ համաձայն N1 հավելվածի:

2. Կարգի կիրառմամբ պայմանավորված աշխատանքների համակարգման նպատակով ստեղծել Հրամանագրով ստեղծված օպերատիվ շտաբին կից հանձնաժողով և հաստատել դրա անհատական կազմը՝ համաձայն N2 հավելվածի։

3. Սահմանել, որ Կարգի կիրառման նկատմամբ վերահսկողությունն իրականացնում է Հրամանագրով ստեղծված օպերատիվ շտաբը:

4. Արցախի Հանրապետության շրջանների վարչակազմերի ղեկավարներին՝ Արցախի Հանրապետության բնակարանային հարցերի կոմիտեին (այսուհետ՝ Կոմիտե) տրամադրել համապատասխան համայնքներում փաստացի բնակվող անձանց վերաբերյալ տեղեկություններ՝ համաձայն Կոմիտեի կողմից պահանջվող ձևի:

5. Սույն որոշումն ուժի մեջ է մտնում հրապարակվելուց հետո՝ անմիջապես

ՀԱՏՈՒԿ ԿԱՐԳ

ՍՆՆԴԱՄԹԵՐՔԻ ՈՐՈՇ ՏԵՍԱԿՆԵՐԻ ՎԱՃԱՌՔԻ ԵՎ ՁԵՌՔԲԵՐՄԱՆ

1. Սննդամթերքի որոշ տեսակների վաճառքի և ձեռքբերման հատուկ կարգով (այսուհետ՝ Կարգ) սահմանվում են Արցախի Հանրապետության տարածքում Կարգի 3-րդ կետում նշված սննդամթերքի վաճառքի և ձեռքբերման հետ կապված հարաբերությունները:

2. Արցախի Հանրապետության տարածքում գրանցված և (կամ) գործունեություն ծավալող իրավաբանական անձինք և անհատ ձեռնարկատերերը (այսուհետ՝ տնտեսավարող սուբյեկտ) 2023 թվականի հունվարի 20-ի ժամը 00:00-ից դադարեցնում են Կարգի 3-րդ կետում նշված սննդամթերքի (այսուհետ՝ սննդամթերք) ազատ վաճառքը՝ այն իրականցնելով բացառապես սննդամթերքի ձեռքբերման կտրոններով (այսուհետ՝ կտրոն)՝ համաձայն Ձևի:

3․ Կարգի գործողությունը տարածվում է սննդամթերքի հետևյալ տեսակների վրա՝

1) մակարոնեղենի,

2) բրնձի,

3) հնդկաձավարի,

4) շաքարավազի,

5) ձեթի։

4. Կտրոնը տրամադրվում է Արցախի Հանրապետության Նախագահի 2022 թվականի դեկտեմբերի 13-ի ՆՀ-1792-Ն հրամանագրի 5-րդ կետի համաձայն ստեղծված օպերատիվ շտաբի անունից՝ Արցախի Հանրապետության բնակարանային հարցերի կոմիտեի (այսուհետ՝ կոմիտե) կողմից, Արցախի Հանրապետությունում փաստացի բնակվող յուրաքանչյուր անձի՝ մեկանգամյա օգտագործման համար:

5. Կտրոնը վավեր է դրանում նշված ժամկետներում:

6. Կտրոնը 3X5 սմ չափերով, կարմիր, կանաչ, կապույտ, նարնջագույն և դեղին գույների դիմերեսով քարտ է:

7. Կտրոնի դիմերեսին նշվում է դրա գործողության ժամկետը, սերիան և հերթական համարը: Սերիան պարունակում է մեկ նիշ, իսկ հերթական համարը՝ ութ նիշ՝ սկսած 00000001-ից: Սերիայի նիշը մեծատառ է և հայատառ:

8. Կտրոնի կորստի դեպքում նոր կտրոն չի տրամադրվում:

9. Կտրոնով վաճառքի ենթակա սննդամթերքի չափը յուրաքանչյուր անձի հաշվարկով ամսական կազմում է՝

1) մակարոնեղեն - 1կգ,

2) բրինձ - 1կգ,

3) հնդկաձավար - 1կգ,

4) շաքարավազ - 1կգ,

5) ձեթ - 1լ։

10. Կարգի 9-րդ կետում նշված չափի սննդամթերքը վաճառվում է կտրոնում նշված չափով և ժամկետներում:

11. Յուրաքանչյուր անձի վերաբերյալ տեղեկությունը՝ ըստ Արցախի Հանրապետության շրջանների վարչակազմերի ղեկավարների կողմից տրամադրված ցանկերի, կոմիտեի կողմից մտցվում է համապատասխան էլեկտրոնային ծրագիր, ինչի հիման վրա էլ յուրաքանչյուր շրջանի վարչակազմին տրամադրվում է իր բնակիչների թվին համապատասխան կտրոն:

12. Կտրոնը ստանալու նպատակով անձն իր (այլ անձի համար՝ նաև տվյալ անձի) անձը հաստատող փաստաթղթ(եր)ով դիմում է կոմիտեի նախագահի հրամանով ստեղծված սպասարկման կետեր՝ Ստեփանակերտ քաղաքում և շրջկենտրոններում, իսկ գյուղական համայնքներում՝ տեղական ինքնակառավարման մարմնի վարչական շենք (այսուհետ միասին՝ սպասարկման կետ):

13. Սպասարկման կետում անձը ստորագրում է ստացական՝ կտրոնը ստանալու վերաբերյալ և ստանում կտրոն(ներ)ը:

14. Օտարերկրյա քաղաքացին կամ քաղաքացիություն չունեցող անձը, ինչպես նաև անձը հաստատող փաստաթղթերի հետ կապված խնդիրներ ունեցող անձը կտրոնը ստանալու նպատակով դիմում է կոմիտեի վարչական շենքի սպասարկման կետ (հասցե՝ քաղաք Ստեփանակերտ, Ս. Դավիթ 2):

15. Կտրոնը ստանալուց հետո՝ դրանում նշված ժամկետներում, անձը հանձնում է այն իր նախընտրած տնտեսավարող սուբյեկտին և ձեռք բերում կտրոնում նշված սննդամթերքը:

16. Տնտեսավարող սուբյեկտը սննդամթերքի ձեռքբերումն իրականացնում է մատակարարող կազմակերպությունից՝ կտրոնների քանակին համապատասխան (բացառությամբ առաջին ամսվա):

17. Մատակարարող կազմակերպությունը տնտեսավարող սուբյեկտից ստացված կտրոնները հավաքագրում և հանձնում է Արցախի Հանրապետության կառավարության 2023 թվականի հունվարի 13-ի N 9-Ն որոշման 2-րդ կետով ստեղծված հանձնաժողով (այսուհետ՝ հանձնաժողով), իսկ հաջորդ բաշխումն իրականացնում է ստացված կտրոններին համապատասխան:

18․ Մատակարարող կազմակերպությունը սննդամթերքը ստանում է հանձնաժողովից։

ԿՏՐՈՆՆԵՐ

ՍՆՆԴԱՄԹԵՐՔԻ ՁԵՌՔԲԵՐՄԱՆ

ԱՆՀԱՏԱԿԱՆ ԿԱԶՄ

ՍՆՆԴԱՄԹԵՐՔԻ ՈՐՈՇ ՏԵՍԱԿՆԵՐԻ ՎԱՃԱՌՔԻ ԵՎ ՁԵՌՔԲԵՐՄԱՆ ՀԱՏՈՒԿ

ԿԱՐԳԻ ԿԻՐԱՌՄԱՄԲ ՊԱՅՄԱՆԱՎՈՐՎԱԾ ԱՇԽԱՏԱՆՔՆԵՐԻ ՀԱՄԱԿԱՐԳՄԱՆ

ՆՊԱՏԱԿՈՎ ԱՐՑԱԽԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ 2022 ԹՎԱԿԱՆԻ

ԴԵԿՏԵՄԲԵՐԻ 13-Ի ՆՀ-1792-Ն ՀՐԱՄԱՆԱԳՐՈՎ ՍՏԵՂԾՎԱԾ ՕՊԵՐԱՏԻՎ

ՇՏԱԲԻՆ ԿԻՑ ՀԱՆՁՆԱԺՈՂՈՎԻ