ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

Լեռնային Ղարաբաղի Հանրապետության կառավարությունը  ո ր ո շ ու մ է.

1. Հաստատել Լեռնային Ղարաբաղի Հանրապետության պետական բյուջեի միջոցների հաշվին ձեռքբերված առողջարանային բուժման և հանգստյան տների ուղեգրերի բաշխման և հատկացման կարգը՝ համաձայն հավելվածի:

2. Սույն որոշման կատարման վերահսկողությունն ու կառավարման լիազորությունները վերապահել Լեռնային Ղարաբաղի Հանրապետության սոցիալական ապահովության նախարարությանը:

3. Ուժը կորցրած ճանաչել Լեռնային Ղարաբաղի Հանրապետության կառավարության 2006 թվականի մայիսի 26-ի «Լեռնային Ղարաբաղի Հանրապետությունում զոհված զինծառայողների ընտանիքների անդամների, հաշմանդամների սանատոր-առողջարանային սոցիալական սպասարկման մասին» թիվ 294 որոշումը:

4. Սույն որոշումն ուժի մեջ է մտնում պաշտոնական հրապարակման պահից:

Կ Ա Ր Գ

1. Սույն կարգով սահմանվում են Լեռնային Ղարաբաղի Հանրապետության պետական բյուջեի միջոցների հաշվին ձեռքբերված առողջարանային բուժման և հանգստյան տների ուղեգրեր ստանալու իրավունքից օգտվող քաղաքացիների խմբերը, ուղեգրերի բաշխման և հատկացման հետ կապված հարաբերությունները:

2. Լեռնային Ղարաբաղի Հանրապետության պետական բյուջեի միջոցների հաշվին՝

ա) առողջարանային բուժման ուղեգրեր առաջնահերթության կարգով հատկացվում են հետևյալ սոցիալական խմբերին.

- հաշմանդամ զինծառայողներ,

- 1-ին և 2-րդ խմբերի հաշմանդամներ, խուլ ու համր 3-րդ խմբի հաշմանդամներ,

- հաշմանդամ երեխայի կարգավիճակ ունեցողներ,

- զոհված զինծառայողների ընտանիքների անդամներ ,

- Հայրենական մեծ պատերազմի վետերաններ և նույն պատերազմում զոհվածների այրիներ,

- Չեռնոբիլի ԱԷԿ-ի վթարից տուժածներ,

- բռնադատվածներ,

- Արցախի հերոսներ, Մարտական խաչ 1-ին և 2-րդ աստիճանի շքանշանակիրներ,

- միայնակ չաշխատող կենսաթոշակառուներ.

բ) հանգստյան տան ուղեգրեր առաջնահերթության կարգով հատկացվում են զոհված զինծառայողների ընտանիքների անդամներին, ինչպես նաև՝ սույն կետի «ա» ենթակետում նշված այլ սոցիալական խմբերի ներկայացուցիչներին:

Հայաստանի Հանրապետության առողջարաններում բուժման ուղեգրվող 1-ին խմբի հաշմանդամներին ու հաշմանդամ երեխայի կարգավիճակ ունեցողներին ուղեկցելու անհրաժեշտության դեպքում ուղեգրեր են հատկացվում նաև նրանց ուղեկցողներին:

(2-րդ կետը լրաց. 21.05.2009 N 317-Ն)

3. Հայաստանի Հանրապետության սահմաններից դուրս մասնագիտացված առողջարաններում բուժման համար ուղեգրեր կարող են հատկացվել միայն 1-ին խմբի հաշմանդամ զինծառայողներին և հաշմանդամ երեխայի կարգավիճակ ունեցողներին:

Սույն կետի առաջին մասում նշված քաղաքացիներին Լեռնային Ղարաբաղի Հանրապետության պետական բյուջեի միջոցների հաշվին տրամադրվում է դրամական փոխհատուցում` բուժման վայր մեկնելու և վերադառնալու հետ կապված ծախսերի դիմաց, իսկ այդ քաղաքացիներին ուղեկցելու անհրաժեշտության դեպքում` նրանց ուղեկցողներին նաև օրապահիկի և գիշերավարձի դիմաց:

4. Հանգստյան տների ուղեգրերի ձեռք բերման համար կարող է ծախսվել տվյալ տարվա Լեռնային Ղարաբաղի Հանրապետության պետական բյուջեով ուղեգրերի ձեռքբերման համար նախատեսված գումարի մինչև 25 տոկոսը:

5. Առողջարանային բուժման և հանգստյան տների ուղեգրերը կարող են հատկացվել սոցիալական ծառայության տարածքային մարմինների (այսուհետ` տարածքային մարմիններ) կողմից:

6. Լեռնային Ղարաբաղի Հանրապետության սոցիալական ապահովության նախարարությունը (այսուհետ` նախարարություն) հաստատում է`

ա) առողջարանային բուժման և հանգստյան տների ուղեգրերի բաշխման տարեկան ծրագիրը` ըստ ժամկետների, առանձին սոցիալական խմբերի և տարածքային մարմինների,

բ) Հայաստանի Հանրապետության սահմաններից դուրս մասնագիտացված առողջարաններում բուժման ուղեգրերի բաշխման տարեկան ծրագիրը` ըստ ժամկետների և առանձին սոցիալական խմբերի:

7. Ուղեգիրը քաղաքացուն հատկացվում է ոչ ուշ, քան ուղեգրում նշված ժամկետից 15 օր առաջ:

8. Հանգստյան տան ուղեգիր ստանալու համար քաղաքացին իր դիմումի հետ միասին ներկայացնում է անձը և իր կարգավիճակը հաստատող փաստաթղթերը, սոցիալական քարտը կամ Լեռնային Ղարաբաղի Հանրապետության սոցիալական ապահովության նախարարության կողմից` Լեռնային Ղարաբաղի Հանրապետության օրենսդրությամբ սահմանված կարգով տրամադրված` սոցիալական քարտ չունենալու մասին տեղեկանքը, իսկ առողջարանային բուժման ուղեգիր ստանալու համար՝ նաև իր բնակության վայրի պոլիկլինիկայի կողմից տրված սանատոր-կուրորտային քարտը:

1-ին խմբի հաշմանդամին կամ հաշմանդամ երեխայի կարգավիճակ ունեցողին տրված սանատոր-կուրորտային քարտը պետք է նշում պարունակի այդ քաղաքացուն ուղեկցելու անհրաժեշտության կամ դրա բացակայության մասին:

Քաղաքացու դիմումը հաշվառվում է դիմումների հաշվառման մատյանում, որի ձևը և վարման կարգը սահմանում է նախարարությունը:

(8-րդ կետը լրաց. 26.01.2010 N 23-Ն)

9. Սույն կարգի 2-րդ կետում նշված քաղաքացիներին ուղեգրեր կարող են հատկացվել երեք տարին մեկ անգամ:

Սույն կետի դրույթները տարածվում են նաև մինչև սույն որոշումն ուժի մեջ մտնելը ծագած հարաբերությունների վրա:

10. Սույն կարգի 2-րդ կետում նշված քաղաքացիները առողջարանից կամ հանգստյան տնից վերադառնալուց հետո, տարածքային մարմին պետք է ներկայացնեն առողջարանում կամ հանգստյան տանը հաշվառված լինելու օրերի մասին տեղեկանք: Տեղեկանքը չներկայացնելու դեպքում քաղաքացին զրկվում է հետագայում ուղեգիր ստանալու իրավունքից:

11. Ուղեգրերը խիստ հաշվառման ֆինանսական փաստաթղթեր են, ենթակա են պահպանման օրենսդրությամբ սահմանված կարգով:

12. Տարածքային մարմինը յուրաքանչյուր ամսվա ընթացքում հատկացված ուղեգրերի մասին տեղեկանք է ներկայացնում նախարարություն` մինչև տվյալ ամսվան հաջորդող ամսվա 10-ը:

13. Նախարարության կողմից հաստատված ծրագրով նախատեսված ժամկետներում չհատկացված, ինչպես նաև քաղաքացիներին հատկացված, սակայն նրանց կողմից չօգտագործված ուղեգրերը տարածքային մարմինը հնգօրյա ժամկետում վերադարձնում է նախարարությանը:

Սույն կետում նշված ուղեգրերը քաղաքացիներին են հատկացվում նախարարության կողմից՝ սույն կարգի 8-րդ և 10-րդ կետերի դրույթներին համապատասխան:

(13-րդ կետը լրաց. 16.09.2008 N 619)