ք.Ստեփանակերտ

ԶԲՈՍԱՇՐՋԱՅԻՆ ԳՈՐԾՈՒՆԵՈՒԹՅԱՄԲ ԶԲԱՂՎՈՂ ՍՈՒԲՅԵԿՏՆԵՐԻ ՀԱՇՎԱՌՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Համաձայն «Զբոսաշրջության և զբոսաշրջային գործունեության մասին» Լեռնային Ղարաբաղի Հանրապետության օրենքի 14-րդ հոդվածի 3-րդ և 4-րդ մասերի` Լեռնային Ղարաբաղի Հանրապետության կառավարությունը որոշում է.

1. Սահմանել` զբոսաշրջային գործունեությամբ զբաղվող սուբյեկտների հաշվառման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է զբոսաշրջային գործունեությամբ զբաղվող սուբյեկտների հաշվառման կարգը` համաձայն «Զբոսաշրջության և զբոսաշրջային գործունեության մասին» Լեռնային Ղարաբաղի Հանրապետության օրենքի պահանջների:

2. Զբոսաշրջային գործունեությամբ զբաղվող սուբյեկտների հաշվառման հիմնական նպատակներն են`

1) մատուցվող զբոսաշրջային ծառայությունների կայուն որակի ապահովումը.

2) սպառողի զբոսաշրջային ծառայությունների օգտվելու ընտրությանն աջակցելը.

3) զբոսաշրջային գործունեությամբ զբաղվող սուբյեկտների մրցունակության բարձրացմանն աջակցելը.

4) զբոսաշրջիկի շահերի պաշտպանության ապահովումը:

3. Զբոսաշրջային գործունեությամբ զբաղվող սուբյեկտներին հաշվառում է Լեռնային Ղարաբաղի Հանրապետության կառավարությանն առընթեր զբոսաշրջության և պատմական միջավայրի պահպանության վարչությունը (այսուհետ` հաշվառող մարմին)` վարչության պետի հրամանով ստեղծված հանձնաժողովի միջոցով, զբոսաշրջային գործունեությամբ զբաղվող սուբյեկտների հաշվառման կարգին համապատասխան:

4. Զբոսաշրջային գործունեությամբ զբաղվող սուբյեկտը հաշվառվելու նպատակով (այսուհետ` հայտատու)` հաշվառող մարմին է ներկայացնում հայտ, որտեղ նշվում են զբոսաշրջային գործունեությամբ զբաղվող սուբյեկտի անվանումը և իրավաբանական հասցեն, կոնտակտային տվյալները (էլեկտրոնային հասցե, հեռախոսահամար, վեբ կայքի հասցե), գործունեության տեսակը (ըստ «Զբոսաշրջության և զբոսաշրջային գործունեության մասին» Լեռնային Ղարաբաղի Հանրապետության օրենքի 13-րդ հոդվածի), գործունեություն իրականացնելու վայրի հասցեն և Լեռնային Ղարաբաղի Հանրապետության արդարադատության նախարարության աշխատակազմի պետական ռեգիստրի գործակալության կողմից տրված պետական գրանցման վկայականի համարը:

5. Հայտին կից ներկայացվում են`

1) զբոսաշրջային գործունեությամբ զբաղվող սուբյեկտի պետական գրանցման վկայականի պատճենը.

2) զբոսաշրջային գործունեությամբ զբաղվող սուբյեկտի գրասենյակի նկատմամբ հայտատուի` սեփականության կամ օգտագործման իրավունքի վկայականի պատճենը:

6. Հայտը մուտքագրելուց հետո` հնգօրյա ժամկետում, հաշվառող մարմինը քննարկում է այն և ընդունում հաշվառման գործընթացը շարունակելու կամ հայտը մերժելու մասին որոշում:

7. Քննարկման արդյունքում հաշվառող մարմինը մերժում է հայտը, եթե`

1) բացակայում է սույն կարգի 5-րդ կետով նախատեսված փաստաթղթերից մեկը.

2) ներկայացված փաստաթղթերից մեկը ակնհայտորեն խեղաթյուրված է կամ կեղծիք է պարունակում.

3) սույն կարգի 4-րդ կետում նշված տեղեկությունները ոչ ամբողջական են տրամադրված.

4) սույն կարգի 8-րդ կետում նշված դեպքում հայտատուն սահմանված ժամկետում չի վերացրել թերությունները:

8. Հայտում կամ ներկայացված փաստաթղթերում ոչ էական թերությունների (վրիպակներ, ոչ իրավաբանական անճշտություններ և այլ նման բացթողումներ) առկայության դեպքում որակավորող մարմինը հայտը ստանալուց հետո հնգօրյա ժամկետում դրա մասին պատշաճ ձևով նախազգուշացնում է հայտատուին` հաջորդող հինգ օրվա ընթացքում թերությունները վերացնելու կամ պահանջվող փաստաթղթերը լրացնելու համար:

9. Հաշվառման գործընթացը շարունակվում է, եթե`

1) սույն կարգի 7-րդ կետում նշված թերությունների մասին հաշվառող մարմինը հայտատուին չի ծանուցել.

2) սույն կարգի 8-րդ կետում նշված դեպքում հայտատուն սահմանված ժամկետում վերացրել է թերությունները:

10. Հաշվառող հանձնաժողովը տեղում ստուգում է զբոսաշրջային գործունեությամբ զբաղվող սուբյեկտի համապատասխանությունը «Զբոսաշրջության և զբոսաշրջային գործունեության մասին» Լեռնային Ղարաբաղի Հանրապետության օրենքի 14-րդ և 15-րդ հոդվածների պահանջներին և ներկայացնում է եզրակացություն հաշվառող մարմնին:

11. Դրական եզրակացության դեպքում, հաշվառող մարմինը զբոսաշրջային գործունեությամբ զբաղվող սուբյեկտին`

1) ըստ գործունեության տեսակների գրանցում է հաշվառման մատյանում` համաձայն «Զբոսաշրջության և զբոսաշրջային գործունեության մասին» Լեռնային Ղարաբաղի Հանրապետության օրենքի 13-րդ հոդվածի ` ըստ Ձև N 1-ի.

2) տալիս է երկլեզու (հայերեն, անգլերեն) հաշվառման վկայական` գործունեության տեսակին համապատասխան, որը համարակալվում է հաշվառման մատյանում ըստ գրանցման հերթական համարի` ըստ Ձև N 2-ի:

12. Հաշվառող հանձնաժողովի բացասական եզրակացության դեպքում հաշվառող մարմինը հինգ աշխատանքային օրվա ընթացքում հայտատուին տեղեկացնում է հաշվառումը մերժելու մասին` նշելով հիմքերը:

13. Հաշվառող մարմինը առնվազն տարին մեկ անգամ կազմակերպում է դիտարկումներ կամ ստուգումներ զբոսաշրջային գործունեությամբ զբաղվող հաշվառված սուբյեկտների` «Զբոսաշրջության և զբոսաշրջային գործունեության մասին» Լեռնային Ղարաբաղի Հանրապետության օրենքի 14-րդ և 15-րդ հոդվածների պահանջներին համապատասխանության վերաբերյալ:

14. Հաշվառման վկայականն ուժը կորցրած է ճանաչվում`

1) զբոսաշրջային գործունեությամբ զբաղվող սուբյեկտի գործունեության դադարեցման պահից,

2) սույն կարգի 13-րդ կետով սահմանված դիտարկման կամ ստուգումների արդյունքում հայտնաբերված «Զբոսաշրջության և զբոսաշրջային գործունեության մասին» Լեռնային Ղարաբաղի Հանրապետության օրենքի 14-րդ և 15-րդ հոդվածների պահանջներին անհամապատասխանության դեպքում:

15. Զբոսաշրջային գործունեությամբ զբաղվող սուբյեկտը պարտավոր է հաճախորդների համար տեսանելի տեղում տեղադրել զբոսաշրջային գործունեությամբ զբաղվող սուբյեկտի հաշվառման վկայականը:

16. Զբոսաշրջային գործունեությամբ զբաղվող հաշվառված սուբյեկտների ցանկը հրապարակվում է Լեռնային Ղարաբաղի Հանրապետության «Karabakh.travel» (Կարաբախ թրավլ) զբոսաշրջային պաշտոնական կայքէջում ըստ գործունեության տեսակի: