ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

Արցախի Հանրապետության տարածքի տնտեսական պաշտպանության, նրա արտաքին սահմաններով բեռների, ապրանքների, այլ արժեքների ու առարկաների (այսուհետև` ապրանքանյութական արժեքների (ԱՆԱ) օրինական ներմուծումը և արտահանումը կանոնակարգելու, ներմուծվող ապրանքների հայրենական սպառողների շահերի պաշտպանության միջոցառումների իրականացմանն աջակցելու նպատակով Լեռնային Ղարաբաղի Հանրապետության կառավարությունը որոշում է.

1. Ստեղծել հետևյալ հսկիչ կետերը և սահմանել դրանց տեղակայման վայրերը.

1) «Աղավնո» հսկիչ կետ` տեղակայման վայրը` Քաշաթաղի շրջան, Աղավնո համայնք, կամրջի մոտ.

2) «Խարխափուտ» հսկիչ կետ` տեղակայման վայրը` Շահումյանի շրջան, Նոր Խարխափուտ համայնք, կամրջի մոտ.

3) «Միջնաբերդ» հսկիչ կետ` տեղակայման վայրը` Շահումյանի շրջան, Քարվաճառ համայնք, Քարվաճառ-Վարդենիս նոր ճանապարհահատվածի առաջին կիլոմետր.

4) «Սանասար» հսկիչ կետ` տեղակայման վայրը` Քաշաթաղի շրջան, Հակարի համայնք, 2 կիլոմետր հեռավորությամբ` մինչև Հայաստանի Հանրապետության Սյունիքի մարզի Ներքին Խնձորեսկ գյուղի խաչմերուկը:

(1-ին կետը փոփ. 02.04.2002 N 81, փոփ. 16.03.2004 N 82, փոփ. 28.03.2012 N 174-Ն, խմբ. 31.05.19 N 433-Ն)

1.1. Սահմանել, որ ապրանքների ներմուծումն Արցախի Հանրապետության տարածք և արտահանումն Արցախի Հանրապետության տարածքից, ինչպես նաև Արցախի Հանրապետության սահմանով ուղևորների տեղափոխումը կատարվում է սույն որոշման 1-ին կետով ստեղծված հսկիչ կետերով:

(1.1-ին կետը լրաց. 31.05.19 N 433-Ն)

2. Հաստատել Արցախի Հանրապետության տարածք ներմուծվող և արտահանվող ապրանքանյութական արժեքների հաշվառման կարգը (կցվում է):

(2-րդ կետը փոփ. 31.05.19 N 433-Ն)

3. Արցախի Հանրապետության հարկային մարմնին` համապատասխան կառուցվածքային ստորաբաժանումների միջոցով ապահովել ներմուծվող և արտահանվող ապրանքանյութական արժեքների հաշվառման հսկիչ կետերի կանոնավոր գործունեությունը` շուրջօրյա ռեժիմով:

(3-րդ կետը փոփ. 31.05.19 N 433-Ն)

4. Արցախի Հանրապետության իրավապահ մարմիններին` աջակցել Արցախի Հանրապետության հարկային մարմնին` իրականացնելու սույն որոշմամբ սահմանված գործառույթները:

(4-րդ կետը փոփ. 31.05.19 N 433-Ն)

5. ԼՂՀ ֆինանսների նախարարությանը` նորաստեղծ հսկիչ կետերի պահպանման ծախսերը իրականացնելու նպատակով ԼՂՀ հարկային պետական վարչությանը հատկացնել 3200000 դրամ ԼՂՀ կառավարության 2000թ. պահուստային ֆոնդի հաշվին:

6. ԼՂՀ կառավարության 1998թ. հուլիսի 14 ‹‹ԼՂՀ հարկային պետական վարչության կանոնադրությունը, կենտրոնական աշխատակազմի և համակարգի կառուցվածքը հաստատելու մասին›› թիվ 109 որոշման մեջ (ԼՂՀ կառավարության 1999թ. հունվարի 26-ի թիվ 10, 1999թ. օգոստոսի 24-ի թիվ 66 և 2000թ. մայիսի 15-ի թիվ 79 որոշումների խմբագրությամբ) կատարել հետևյալ փոփոխությունը.

Որոշման 2-րդ կետի ա ենթակետով ‹‹67.5›› թիվը փոխարինել ‹‹83.5›› թվով:

7. Ուժը կորցրած ճանաչել ԼՂՀ կառավարության 2000 թվականի մարտի 31-ի թիվ 59 որոշման թիվ 1 հավելվածի 3-րդ կետը:

8. ԼՂՀ ներքին գործերի նախարարությանը` Եղծահող գյուղի մաքսային գրասենյակի շենքը 7640000 դրամ հաշվեկշռային արժեքով հանձնել ԼՂՀ հարկային պետական վարչությանը:

9. ԼՂՀ ներքին գործերի նախարարությանը, ԼՂՀ հարկային պետական վարչությանը` երկշաբաթյա ժամկետում ավարտել շենքի հանձնման-ընդունման աշխատանքները:

10. Սույն որոշումն ուժի մեջ է մտնում 2000թ. օգոստոսի 15-ից:

Կ Ա Ր Գ

(վերնագիրը փոփ. 31.05.19 N 433-Ն)

Սույն կարգը բխում է ԼՂՀ կառավարության ‹‹31›› հուլիսի 2000թ. թիվ 152 որոշումից և նպատակ ունի հանրապետության տարածքի տնտեսական պաշտպանության, նրա արտաքին սահմաններով բեռների, ապրանքների, այլ արժեքների ու առարկաների (այսուհետ` ԱՆԱ) օրինական ներմուծումը և արտահանումը կանոնակարգելու, ներմուծվող ապրանքների հայրենական սպառողների շահերի պաշտպանության միջոցառումների իրականացմանն աջակցել ինչպես նաև սահմանում է տնտեսավարող սուբյեկտների կողմից Արցախի Հանրապետության տարածք ներմուծվող և արտահանվող ապրանքանյութական արժեքների գրանցման և հաշվառման ձևը:

(նախաբանը փոփ. 31.05.19 N 433-Ն)

1. Տնտեսավարող սուբյեկտները և ֆիզիկական անձինք ԱՆԱ Արցախի Հանրապետության տարածք ներմուծելիս կամ արտահանելիս պարտավոր են հսկիչ կետերում գրանցվել և ԱՆԱ –ի մասին փաստաթղթերը տրամադրել հսկիչ կետի պաշտոնատար անձին:

(1-ին կետը փոփ. 31.05.19 N 433-Ն)

2. Հարկային մարմինները պարտավոր են ստուգել փաստաթղթերի համապատասխանությունը փաստացի ներմուծվող կամ արտահանվող ապրանքներին, որից հետո գրանցել համապատասխան մատյաններում:

3. Ներմուծման ժամանակ, տեղում ստուգման անհնարինության դեպքում, հարկային մարմինների կողմից օգտագործվում են ապահովության միջոցներ (կապարակնիքներ):

4. Գրանցում իրականացնող մարմինը լրացնում է հաշվառման քարտ, որի ձևը սահմանվում է Արցախի Հանրապետության հարկային մարմնի կողմից:

(4-րդ կետը փոփ. 31.05.19 N 433-Ն)

5. Հաշվառման քարտը ստորագրվում է բեռը փոխադրողի և հարկային մարմնի պաշտոնատար անձի (քարտը կազմողի) կողմից:

6. Հաշվառման քարտի մեկ օրինակը տրվում է բեռը փոխադրողին:

7. Կապարակնիքներ օգտագործելու դեպքում, հաշվառման քարտի մեջ նշվում է դրանց քանակը և համարները:

8. Կապարակնիքի բացումը և բեռնաթափումը կատարվում է հարկային մարմնի ներկայացուցչի ներկայությամբ:

9. Կապարակնիքները վնասելու կամ առանց հարկային մարմնի ներկայացուցչի բեռնային գործողություններ (բեռնաթափում, փոխաբեռնում, բեռը ուրիշին հանձնում) կատարելու դեպքում, բեռը փոխադրողը պատասխանատվություն է կրում Արցախի Հանրապետության օրենսդրությամբ սահմանված կարգով:

(9-րդ կետը փոփ. 31.05.19 N 433-Ն)

10. Հաշվառման հսկիչ կետերում գրանցված տեղեկությունները պարբերաբար ներկայացվում են Արցախի Հանրապետության հարկային մարմին` սահմանված կարգով ընթացքավորելու նպատակով, իսկ Արցախի Հանրապետության սահմանով թմրանյութերի, զենքի, զինամթերքի, Արցախի Հանրապետության և արտասահմանյան երկրների մշակութային ու պատմական ժառանգության առարկաների, մտավոր (ինտելեկտուալ) սեփականության և այլ առարկաների ապօրինի շրջանառության դեպքում` ներկայացվում են իրավապահ մարմիններին:

(10-րդ կետը փոփ. 31.05.19 N 433-Ն)

11. Սույն կարգի պահանջների կատարման պատասխանատվությունը կրում է Արցախի Հանրապետության հարկային մարմինը:

(11-րդ կետը փոփ. 31.05.19 N 433-Ն)

(կարգը փոփ. 31.05.19 N 433-Ն)