ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

Լեռնային Ղարաբաղի Հանրապետությունում ծնելիության աճի խթանման և չաշխատող կանանց սոցիալական վիճակի բարելավման նպատակով՝ Լեռնային Ղարաբաղի Հանրապետության կառավարությունը որոշում է.

1. Սահմանել, որ ԼՂՀ-ում մշտական հաշվառում ունեցող չաշխատող կանանց Լեռնային Ղարաբաղի Հանրապետության պետական բյուջեի միջոցների հաշվին հատկացվում է հղիության և ծննդաբերության նպաստ՝ Լեռնային Ղարաբաղի Հանրապետության օրենսդրությամբ սահմանված ժամանակավոր անաշխատունակության թերթիկի հիման վրա:

2. Հաստատել չաշխատող կանանց հղիության և ծննդաբերության նպաստ հատկացնելու կարգը՝ համաձայն հավելվածի:

3. Լեռնային Ղարաբաղի Հանրապետության առողջապահության նախարարին՝ միջոցներ ձեռնարկել միևնույն անձին մեկից ավելի ժամանակավոր անաշխատունակության թերթիկներ տրամադրելը բացառելու համար:

4. Լեռնային Ղարաբաղի Հանրապետության սոցիալական ապահովության նախարարին, Լեռնային Ղարաբաղի Հանրապետության առողջապահության նախարարին, Լեռնային Ղարաբաղի Հանրապետության սոցիալական ապահովագրության պետական հիմնադրամի նախագահին՝ ապահովել սույն որոշման հասարակական իրազեկումը:

5. Սույն որոշումն ուժի մեջ է մտնում 2008 թվականի հունվարի 1-ից:

Կ Ա Ր Գ

1. Սույն կարգով սահմանվում են չաշխատող կանանց Լեռնային Ղարաբաղի Հանրապետության պետական բյուջեի միջոցների հաշվին հղիության և ծննդաբերության նպաստ հատկացնելու հետ կապված հարաբերությունները:

2. Հղիության և ծննդաբերության նպաստ (այսուհետ՝ նպաստ) հատկացվում է.

ա) նպաստի իրավունք ձեռք բերելու պահին գործատուի հետ աշխատանքային հարաբերությունների մեջ չգտնվող կանանց,

բ) վերջին մեկ տարվա ընթացքում մինչև նպաստի իրավունք ձեռք բերելու պահը 3 ամսից պակաս կամ վերջին 2 տարվա ընթացքում՝ 10 ամսից պակաս աշխատած՝ որոշակի ժամկետով կնքված պայմանագրով վարձու աշխատող հանդիսացող կանանց:

3. Սույն կարգի 2-րդ կետի «ա» և «բ» ենթակետերում նշված կանայք (այսուհետ՝ չաշխատող կին) նպաստի իրավունք են ձեռք բերում ծննդաբերելուց 70 օր առաջ, իսկ սույն կարգի 5-րդ կետի 2-րդ մասում նշված դեպքերում՝ երեխայի ծնվելու պահից:

4. Նպաստ ստանալու համար չաշխատող կինը Լեռնային Ղարաբաղի Հանրապետության սոցիալական ապահովագրության պետական հիմնադրամի՝ իր փաստացի բնակության վայրի ստորաբաժանում է ներկայացնում դիմում՝ կցելով բժշկական հաստատության կողմից տրված՝ Լեռնային Ղարաբաղի Հանրապետության օրենսդրությամբ սահմանված ժամանակավոր անաշխատունակության թերթիկը:

Նպաստ հատկացվում է, եթե դիմումը տրվել է նպաստի իրավունք ձեռք բերելու պահից երկու ամսվա ընթացքում: Նպաստը վճարվում է անհատ ձեռնարկատերերին ժամանակավոր անաշխատունակության նպաստների վճարման համար Լեռնային Ղարաբաղի Հանրապետության օրենսդրությամբ սահմանված կարգով և ժամկետներում:

5. Չաշխատող կնոջը նպաստը հատկացվում է «Նվազագույն ամսական աշխատավարձի մասին» Լեռնային Ղարաբաղի Հանրապետության օրենքի 1-ին հոդվածով սահմանված նվազագույն ամսական աշխատավարձի (այսուհետ՝ օրենքով սահմանված նվազագույն աշխատավարձ) 4.6‑ապատիկի չափով՝ անկախ ծնված երեխաների թվից և ծննդաբերությունը բարդ լինելուց:

Հղիության 154 օրից հետո վաղաժամ ծննդաբերած և նպաստի համար չդիմած, ինչպես նաև նորածին որդեգրած կամ նորածնի խնամակալ նշանակված չաշխատող կնոջը նպաստը հատկացվում է երեխայի ծնվելու պահին օրենքով սահմանված նվազագույն աշխատավարձի 2.3‑ապատիկի չափով:

6. Մինչև 2008 թվականի հունվարի 1-ը նպաստի իրավունք ձեռք բերած, սակայն այդ պահի դրությամբ չծննդաբերած կանայք նպաստ ստանալու համար կարող են դիմել մինչև 2008 թվականի մարտի 1-ը: