ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

Լեռնային Ղարաբաղի Հանրապետությունում ամուսնությունները խրախուսելու և նորաստեղծ ընտանիքներին պետական աջակցություն ցուցաբերելու նպատակով՝ Լեռնային Ղարաբաղի Հանրապետության կառավարությունը որոշում է.

1. Լեռնային Ղարաբաղի Հանրապետության օրենսդրության համաձայն ամուսնության գրանցման դեպքում նորաստեղծ ընտանիքի համար սահմանվում է ամուսնության միանվագ նպաստ, որը հատկացվում է Լեռնային Ղարաբաղի Հանրապետության պետական բյուջեի միջոցների հաշվին` ամուսիններից յուրաքանչյուրին 150.0 հազար դրամի չափով:

(1-ին կետը խմբ. 19.04.2013 N 199-Ն)

2. Հաստատել ամուսնության միանվագ նպաստ հատկացնելու կարգը՝ համաձայն հավելվածի:

3. Լեռնային Ղարաբաղի Հանրապետության արդարադատության նախարարությանը՝ Լեռնային Ղարաբաղի Հանրապետության աշխատանքի և սոցիալական հարցերի նախարարությանը տրամադրել՝

ա) յուրաքանչյուր ամսվա ընթացքում տրված ամուսնության վկայականների կրկնօրինակների (միայն 2008 թվականի հունվարի 1-ից հետո գրանցված ամուսնությունների) տվյալները՝ մինչև հաջորդ ամսվա 10-ը,

բ) յուրաքանչյուր ամսվա ընթացքում տրված ամուսնալուծության վկայականների տվյալները՝ մինչև հաջորդ ամսվա 10-ը:

(3-րդ կետը փոփ. 19.04.2013 N 199-Ն)

4. Լեռնային Ղարաբաղի Հանրապետության պետական կառավարման մարմիններին՝ սույն որոշմամբ սահմանված աշխատանքների իրականացման համար համագործակցել Լեռնային Ղարաբաղի Հանրապետության աշխատանքի և սոցիալական հարցերի նախարարության հետ:

(4-րդ կետը փոփ. 19.04.2013 N 199-Ն)

5. Սույն որոշման կատարման վերահսկողության և կառավարման լիազորությունները վերապահել Լեռնային Ղարաբաղի Հանրապետության աշխատանքի և սոցիալական հարցերի նախարարությանը:

(5-րդ կետը փոփ. 19.04.2013 N 199-Ն)

6. Լեռնային Ղարաբաղի Հանրապետության աշխատանքի և սոցիալական հարցերի նախարարին, Լեռնային Ղարաբաղի Հանրապետության շրջանների վարչակազմերի ղեկավարներին, Ստեփանակերտի քաղաքապետին՝ ապահովել սույն որոշման հասարակական իրազեկումը:

(6-րդ կետը փոփ. 19.04.2013 N 199-Ն)

7. Սույն որոշումն ուժի մեջ է մտնում 2008 թվականի հունվարի 1-ից:

Կ Ա Ր Գ

1. Սույն կարգով սահմանվում են Լեռնային Ղարաբաղի Հանրապետության օրենսդրության համաձայն ամուսնության գրանցման դեպքում ամուսնության միանվագ նպաստ (այսուհետ՝ նպաստ) հատկացնելու հետ կապված հարաբերությունները:

(1-ին կետը փոփ. 19.04.2013 N 199-Ն)

2. Նպաստի իրավունք ունի 40 տարին չլրացած`

ա) Լեռնային Ղարաբաղի Հանրապետությունում հաշվառված այն անձը, ում ամուսնությունը գրանցվել է Լեռնային Ղարաբաղի Հանրապետության քաղաքացիական կացության ակտերի գրանցման մարմնում,

բ) Լեռնային Ղարաբաղի Հանրապետության զինված ուժերում և այլ զորքերում պայմանագրային զինվորական ծառայություն անցնող այն անձը (անկախ հաշվառման վայրից), ով ամուսնացել է Լեռնային Ղարաբաղի Հանրապետությունում հաշվառված անձի հետ և ամուսնությունը գրանցվել է Լեռնային Ղարաբաղի Հանրապետության քաղաքացիական կացության ակտերի գրանցման մարմնում:

Անձին նպաստ է հատկացվում միայն մեկ անգամ:

2013 թվականի հունվարի 1-ից հետո ամուսնալուծման և նույն անձի հետ ամուսնության գրանցման դեպքում նպաստ չի հատկացվում:

(2-րդ կետը լրաց. 23.06.2009 N 394-Ն, խմբ. 19.04.2013 N 199-Ն)

3. Նպաստ հատկացնելու համար անձը գրավոր դիմումի հետ ամուսնության գրանցման վայրի սոցիալական ծառայություններ տրամադրող մարմին (այսուհետ` իրավասու մարմին) է ներկայացնում նաև.

ա) անձնագիրը կամ անձը հաստատող այլ փաստաթուղթը (հաշվառման և ամուսնության մասին նշումները պարտադիր են) և դրա պատճենը,

բ) սոցիալական ապահովության քարտը և դրա պատճենը կամ Լեռնային Ղարաբաղի Հանրապետության օրենսդրությամբ սահմանված կարգով տրամադրված` սոցիալական քարտ չունենալու մասին տեղեկանքը,

գ) ամուսնության վկայականը և պատճենը։

Սույն կարգի 2-րդ կետի «բ» ենթակետում նշված անձինք սույն կետով սահմանված փաստաթղթերից բացի ներկայացնում են նաև «Զինվորական ծառայություն անցնելու մասին» Լեռնային Ղարաբաղի Հանրապետության օրենքով սահմանված՝ համապատասխան պետական լիազոր մարմնի տված տեղեկանքը` պայմանագրային հիմունքներով ծառայություն անցնելու մասին:

(3-րդ կետը փոփ., լրաց. 23.06.2009 N 394-Ն, լրաց. 26.01.2010 N 23-Ն, խմբ. 19.04.2013 N 199-Ն)

4. Դիմումը և անհրաժեշտ փաստաթղթերն ընդունելու ժամանակ իրավասու մարմնում՝

ա) դիմումում լրացված տվյալները համեմատվում են անձնագրի և ներկայացված մյուս փաստաթղթերի տվյալների հետ,

բ) փաստաթղթերի բնօրինակները համեմատվում են դրանց պատճենների հետ, պատճենների վրա կատարվում «Իսկականի հետ ճիշտ է» գրառումը և կնքվում իրավասու մարմնի կնիքով,

գ) անձի դիմումը հաշվառվում է դիմումների հաշվառման մատյանում,

դ) ամուսնության վկայականի բնօրինակի դարձերեսը կնքվում է, կատարվում «Հաշվառված է ամուսնության միանվագ նպաստ հատկացնելու համար» գրառումը (նշելով անձի անունը և ազգանունը), թվագրվում և ստորագրվում,

ե) ստեղծվում է նպաստի գործ, որին տրվում է համար՝ բաղկացած իրավասու մարմնի կոդից և հերթական համարից:

Փաստաթղթերի պատճենները մնում են իրավասու մարմնում, իսկ բնօրինակները վերադարձվում են դիմողին:

(4-րդ կետը փոփ., լրաց. 19.04.2013 N 199-Ն)

5. Նպաստ հատկացվում է դիմումն անհրաժեշտ փաստաթղթերով ամուսնության գրանցման պահից 6 ամսվա ընթացքում ներկայացնելու դեպքում:

6. Յուրաքանչյուր ամսվա ընթացքում ստեղծված գործերի հիման վրա, մինչև հաջորդ ամսվա 5‑ը, իրավասու մարմինը հայտ է ներկայացնում (կցելով էլեկտրոնային կրիչ՝ գործերում առկա տվյալներով) Լեռնային Ղարաբաղի Հանրապետության աշխատանքի և սոցիալական հարցերի նախարարություն (այսուհետ՝ լիազոր մարմին)՝ որը.

ա) ներկայացված տվյալները համադրում է Լեռնային Ղարաբաղի Հանրապետության արդարադատության նախարարության տրամադրած տվյալների հետ,

բ) ամփոփում է հայտերը և ընդհանուր ֆինանսավորման հայտ ներկայացնում Լեռնային Ղարաբաղի Հանրապետության ֆինանսների և էկոնոմիկայի նախարարություն,

գ) ֆինանսական միջոցները ստանալուց հետո դրանք փոխանցում է իրավասու մարմիններին:

(6-րդ կետը փոփ. 19.04.2013 N 199-Ն)

7. Նպաստի վճարումները իրականացվում են «Արցախբանկ» ՓԲԸ-ի մասնաճյուղերի միջոցով՝ իրավասու մարմնի կողմից կազմված վճարման ցուցակներով:

8. Յուրաքանչյուր եռամսյակի ավարտից հետո, մինչև եռամսյակին հաջորդող ամսվա 15-ը, «Արցախբանկ» ՓԲԸ-ի համապատասխան մասնաճյուղի կողմից հաշվետվություն է ներկայացվում իրավասու մարմին՝ եռամսյակի ընթացքում ստացված և վճարված գումարների մասին, որի պատճենը 3 աշխատանքային օրվա ընթացքում իրավասու մարմնի կողմից ներկայացվում է լիազոր մարմին:

10. Նպաստի գործում կեղծ (ոչ հավաստի) փաստաթղթեր հայտնաբերելու դեպքում նպաստի գումարը հետ է գանձվում՝ Լեռնային Ղարաբաղի Հանրապետության օրենսդրությամբ սահմանված կարգով:

11. Սույն կարգի 3-րդ կետում նշված դիմումի, 4-րդ կետում նշված հաշվառման մատյանի, 6-րդ կետում նշված՝ էլեկտրոնային կրիչով ներկայացվող տվյալների, 7-րդ կետում նշված վճարման ցուցակի ձևերը, ինչպես նաև 4-րդ կետում նշված կոդերը հաստատվում են լիազոր մարմնի կողմից: